Fondacioni Domi ka përfunduar rikonstruksionin dhe pajisjen me mjete sportive moderne të palestrës së Shtëpisë së Fëmijës “Zyber Hallulli” në Tiranë, duke e kthyer një hapësirë dikur jo funksionale në një mjedis modern, social dhe argëtues për 40 fëmijët e kësaj qendre.

Mjediset sportive janë pajisur me mjete bashkëkohore sportive dhe argëtuese, si dhe me kushte të përshtatshme për ftohje dhe ngrohje, duke krijuar një ambient të sigurt dhe funksional ku fëmijët mund të bëjnë sport, të luajnë dhe të kalojnë kohë cilësore së bashku.

Presidenti i Fondacionit Domi, z. Dervish Domi, njëherazi President i Atlas Corporation, u shpreh se ky kontribut ka një domethënie të veçantë personale për të.

“Jemi shumë të lumtur që kemi mundësi të ndihmojmë vogëlushët e Shtëpisë së Fëmijës ‘Zyber Hallulli’. Unë jam rritur vetë jetim, pa babain. Nëna na rriti e vetme, me shumë vështirësi, gjashtë fëmijë. Ndaj gëzohem shumë që sot mund të ndihmoj sadopak. Nuk do t’i lëmë vetëm këta fëmijë,” tha z. Domi.

Drejtoresha e Shtëpisë së Fëmijës “Zyber Hallulli”, znj. Valbona Imeraj, falënderoi Fondacionin Domi për mbështetjen e dhënë.

“Falënderojmë nga zemra Fondacionin Domi dhe veçanërisht Presidentin Dervish Domi. Për ne kjo është një ndihmë shumë e madhe. Fëmijët do të kenë mundësi të luajnë dhe të argëtohen në një mjedis modern, me të gjitha kushtet e nevojshme për ftohje, ngrohje dhe aktivitete sportive e argëtuese,” theksoi znj. Imeraj.

Zv. Presidenti i Atlas Corporation, z. Aurel Domi, u shpreh se ky është një ndër aktivitetet sociale të Fondacionit Domi dhe se nisma të tilla do të vijojnë edhe në të ardhmen.

“Ky është një ndër aktivitetet sociale të Fondacionit Domi dhe këto punë të mira do të vijojnë. Ne kemi kënaqësi t’i mirëpresim një ditë fëmijët e Shtëpisë së Fëmijës ‘Zyber Hallulli’ në fabrikën e Atlas dhe Ola në Kashar. Duam që ata të vijnë, të argëtohen dhe të mësojnë,” tha z. Aurel Domi.

Fondacioni Domi është pjesë e Korporatës Atlas, e cila përbëhet nga disa kompani, ndër të cilat Atlas Mills, Ola Foods, Besniku sh.p.k., Atlas Energy, Edil Centro etj. Kompanitë e këtij grupi kontribuojnë së bashku në kuadër të përgjegjësisë sociale, me qëllim mbështetjen e shtresave vulnerabël dhe komuniteteve në nevojë në shoqërinë shqiptare. Kontributi që më parë bëhej në mënyrë direkte nga kompanitë tashmë kanalizohet përmes Fondacionit Domi.

Përmes këtij investimi, Fondacioni Domi synon të krijojë më shumë mundësi për zhvillimin fizik, social dhe emocional të fëmijëve, duke u ofruar atyre një hapësirë më të mirë për lojë, sport dhe ndërveprim.